Tekstas nesunorminta rašyba

pagal: Ari Þorgilsson hinn fróði. Íslendingabók. Utgitt av Anne Holtsmark. Oslo: Dreyers Forlag, 1978 [1951].  (22–25 pusl.)

[O]lafr rex Trygvaſonr Olafsſonar Harallzsonar enſ Harfagra com criſtni i Noreg oc a Iſland.

hann sendi hingat til lanz preſt þann er het Þangbrandr. oc her kendi monnom criſtni oc ſcirþi þa alla es viþ tru toco.

En Hallr a Siþu Þorsteins ſonr let ſciraſc ſnimhendis oc Hiallti Sceggiasonr yr Þiorsardali. oc Gizor en Hviti Teitz ſon Ketilbiarnarſonar fra Moſfelli. oc marger hófþiŋiar aþrer. 

Enn þeir voro þo flęiri es í gegn męlto oc neitto.

Enn þa er hann hafþi her veriþ einn vetr eþa ii. þa for hann a braut. oc hafþe vegit her ii. menn eþa iii. þa er hann hofþo nidt.

En hann ſagþi conuŋinom Olafi eſ hann com auſtr allt þat es her hafþi yfir hann giŋiþ. oc let orvęnt at her mundi criſtni en tacaſc. 

En hann varþ viþ þat reiþr mioc. oc ętlaþi at lata męiþa eþa drepa oſſa landa fyrer þa eſ þar voro auſtr. 

En þat sumar et sama qvomo vtan heþan þeir Gizor oc Hiallti oc þogo þa vndan viþ conuŋenn. oc heto honom vmbſyſlo sini til á nyia lęic at her yrþi enn viþ Cristnini tekit. oc leto ser eigi annars von en þar mundi hlyþa. 

En et nęſta ſumar epter foro þeir auſtan oc prestr sa es Þormoþr het. oc qvomo þa i Veſtmana eyiar eſ x. vicur voro af sumri oc hafþi allt fariſc vel at.

Sva qvad Teitr þann ſegia es sialfr var þar. 

þa vas þat męlt et nęsta sumar aþr i Logom at men scylldi sva coma til Alþingis es x. vikur vęri af sumri. en þangat til qvomo viku fyrr. 

Enn þeir foro þegar inn til meginnlanz oc ſiþan til Alþingis. oc goto at Hiallta at hann vas eþter i Laugardali meþ xii man. af þvi at hann hafþi aþr secr orþit fiorbꜹgſ maþr et nęsta sumar a Alþingi of goþgo. 

Enn þat vaſ til þes haft at hann qvad at Logbergi qviþling þenna.

Vil ec eigi goþ gøyia gray þykir mer Frayia. 

Enn þeir Gizor foro vnz þeir qvomo i ſtaþ þann i hia Olfoſs vatni es kallaþr es Vellankatla. oc gørþo orþ þaþan til þings at a mot þeim scylldi coma aller fulltings men þeira. Af þvi at þeir hofþo spurt at andſcotar þeirra villdi veria þeim vigi þingvǫllenn

En fyrr en þeir føri þaþann þa kom þar riþandi Hiallti oc þeir er epter voro meþ honom. 

En siþan riþv þeir a þingit oc qvomu aþr a mót þeim frændr þeira oc viner sem þeir hofþo ęſt.

En ener heiþnu men Hvrfu ſamann meþ alvępni. oc hafþi ſva nęr at þeir myndi beriaſc at <eigi> of ſa a miþli. 

En annann dag epter geingo þeir Gizor oc Hiallti til Logbergs. oc bǫro þar vpp erindi sin. 

En ſva er sagt at þat bęri fra hve vel þeir męltu. En þat gørþiſc af þvi at þar nefnþi annar maþr at oþrom vatta. oc sogþvsc hvarer vr Logom viþ aþra ener Criſtnu men oc ener Heiþno. oc giŋo siþan fra Logbergi. 

þá boþo ener criſtno men Hall a Siþo at hann ſcylldi log þeira vpp ſegia þav eſ criſtnenne scyllde fylgia. 

Enn hann leyſtiſc þvi vndan viþ þa at hann caypti at Þorgeiri Logsogo mani at hann scylldi vpp ſegia. en hann vas enn þa heiþinn.

En siþan es men qvomo i bvþer þa lagþiſc hann niþr Þorgeir. oc bręiddi felld sinn a sic. oc hvilþi þann dag allann oc nottena epter oc qvad ecke orþ.

En of morgonen epter settiſc hann vpp. oc gørþi orþ at men scylldi ganga til Logbergis.

Enn þa hof hann tolo sina vpp eſ menn qvomo þar. oc sagþi at honom þotti þa commit hag mana i ǫnytt efni ef men scylldi eigi hafa aller log ęin a landi her. oc talþi fyrer monom a marga vega at þat scylldi eigi láta verþa. Oc ſagþi at þat mundi at þvi oſætti verþa eſ viſa von vas at þęr barſmiþer gørþiſc a miþli manna eſ landeþ eyddiſc af. 

Han sagþi fra þvi at conuŋar vr Norvegi oc vr Danmorco hofþo haft ofriþ oc orostor a miþli sin laŋa tiþ til þess vnz lanzmen gørþo friþ a miþli þeira þott þeir villdi eigi.

Énn þat ráþ gørþiſc sva at af stundu senduſc þęir gerſemar a miþli. enda hellt friþr sa meþann þeir lifþv. 

En nv þykker mér þat ráþ qvaþ hann at ver latem oc eigi þa raþa er meſt vilia i gegn gangasc. oc miþlom sva mǫ́l a miþli þeira at hverer tvegio haꝩi nacqvat sins máls. oc hoꝩom aller ein Log oc ęinn siþ. 

Þat mon verþa satt eſ ver ſlitom i ſundr Logen at ver monom ſlita oc friþen.

En hann lauc sva mali sino at hvarer tveggio iotto þvi at aller scylldi ein Log haꝩa þav sem hann reþi upp at segia. 

Þá vas þat męllt i logom at aller men scylldi Criſtner veſa oc scirn taca þeir er aþr voro oscirþer a landi her. 

En of barna vtburþ scylldo standa en forno log oc oꝩ hroſſakiotz át.

Scylldo menn blota a lavn ef villdo. en varþa fiorbaugs garþr ef vottom of qvæmi viþ.

Enn siþar fom vetrom var sv heiþni af numen sem onnor. 

 Þena atburþ ſagþi Teitr oſſ at þui er criſtni com a Iſland.

En Olaꝩr Trygvasonr fell et sama svmar at sogo Sęmundar preſtz. 

þá barþiſc hann viþ Svein Harallz son. Dana conung. oc Olaꝩ enn Sønſca Eiricſſon at  Vpſolum Svía conuŋs oc Eiric eſ ſiþan, vas iarl at Norvegi Hǫconarſon.

Þat vas cxxx. vetrum epter dráp Eadmundar. enn M. epter burþ Criſtz at alþyþo tali.